21 anyos sa Jaro nga nakuhaan sang masobra P20,000 nga balor sang peke nga kwarta, nag-ako nga plano niya ipalapta ang fake money

By: Aine Grace Bravo | November 6, 2019

via Francisco Enar

Iloilo City — Na-recover pa gid ni San Isidro punong barangay Felix Dureza ang mga peke nga P500 bills sa palibot sang barangay matapos siya nagpanawagan kagab-i, Nobyembre 5.

Kasunod ini sang pagka-aresto kay Edmund dela Torre, 21-anyos, nga nagapanag-iya sang mga peke nga kuwarta.

Una nga na-recover sa balay sa Brgy. San Isidro ang P27,000 nga balor sang P500 bills nga nasulod sa bag.

Gindakup si dela Torre sang Lunes sang gab-i bangud sa pagsugo sa iya mga abyan nga magbakal sang sigarilyo kag makahulubog nga ilimnon gamit ang duha ka 500-peso bill sa tiangge sang pamilya Arroyo sa San Isidro.

Una na ginsugid ni dela Torre nga tuyo niya lang supton ang mga peke nga kuwarta pero nag-ako sang ulihi nga plano niya ini ipalapta paagi sa pagbakal sa mga tiangge.

Gin-ako man niya nga ginhatag niya sa iya mga abyan ang nabilin nga peke nga kuwarta.

Suno kay dela Torre, sa Cubao siya nagkuha sang mga peke nga kuwarta pero sa subong, wala na siya sang contact sa iya ginkuhaan.