ArchivesLokal

Network signal sa Nanga, Pototan kag kaingud nga mga barangay, nagapabilin nga problema bangud sa signal jamming device sa Iloilo District Jail

By: Aine Grace Bravo | November 8, 2019

via Hotline

Pototan, Iloilo — Duha ka bulan na nga naga-antos ang mga pumuluyo sa problema sa ila communication lines sa Nanga, Pototan kag kaiping nga mga barangays bangud sa gin-install nga cellphone signal jammer sa Iloilo District Jail (IDJ).

Suno kay Nanga, Pototan Punong Barangay Julie Sequio, katapusan nga semana sang Agosto nila na-notisyahan ang problema sa ila mga communication lines.

Apektado man sang amo nga problema suno kay Sequio ang barangays Bongco, Culob, Cansilayan, Jebioc sa Pototan kag Cabilauan sa Barotac Nuevo.

Natukiban nila nga may gin-install nga signal jammer sa IDJ sang nagpanugid ang asawa sang isa sa mga inmates.

Sugod gin-install ang signal jammer, 24/7 na nga wala sang signal ang ila cellphone.

Gilayon sila nga nagpadala sang complaint letter kag ginsapol si Jail Chief Inspector Richard Servano, jail warden sang IDJ agud ipahibalo ang ila problema.

Nagpasalig si Servano nga i-off ang signal jammer, pero wala man sang may ginbag-o sa problema sang ila communication lines.

Ginpahayag ni Sequio nga indi sila dali-dali nga makatawag sa mga pulis kun kinahanglan kag naga-ugtas bisan ang ila mga himata nga indi maka-contact sa ila.