Jail officer sa Bacolod City, patay sa ambush; duha pa pilason

By: Aine Grace Bravo | November 9, 2019

via Aksyon Radyo Bacolod

Bacolod City — Patay sa ambush ang jail officer samtang nakaluwas ang iya amay nga retirado nga senior jail officer sa Purok Katipunan, Brgy. Cabug, Bacolod City pasado las 12 kaina sang kaagahon.

Ginkilala ang napatay kay Jail Officer 1 Jayvee Jason Vargas, 28, sang Brgy Handumanan.

Suno kay Police Station 9, Bacolod City Police Office Commander Lt. Jovito Pastrana, nagasakay sa pick-up ang mag-amay upod si Gian Philip Yoro, 25 anyos, kag nagapakadto sa Brgy. Handumanan sang gulpi lang nag-overtake ang duha ka motorsiklo kag gintiro sila.

Antes natabu ang pagpang-ambush, ginsugat ni Vargas ang iya amay nga si retired Senior Jail Officer 2 Joeby Vargas, 59 anyos, sa New Negros Coliseum sa Brgy. Pahanocoy.

Napilasan sa ulo kag nagkalain-lain nga parte sang lawas si JO1 Vargas samtang padayon naman nga ginabulong sa ospital ang iya amay kag kaupod nga si Yoro.

Na-recover sa crime scene ang 95 ka basiyo kag bala sang nagkalain-lain nga kalibre sang pusil.

Suno kay Pastrana, masobra walo ang suspek sa krimen.

Anum ka bulan na ang nakaligad sang gin-ambush man si JO1 Vargas sa Reclamation Area sa Bacolod City pero nakaluwas siya.