PDEA 6, nagtadlong nga wala sila naka-install sang signal jamming device sa IDJ-Nanga, Pototan

By: JoMaque | Nobyembre 10, 2019, 8:52am

Iloilo — Wala sang labot ang Philippine Drug Enforcement Agency (PDEA) 6 sa pag-install sang signal jamming device sa Iloilo District Jail (IDJ) sa Nanga, Pototan.

Ini ang gin-athag ni PDEA 6 Director Alex Tablate kasunod sang impormasyon nga taga-PDEA ang nag-install sang device nga nagatuga sang perwisyo sa mga pumuluyo sa Nanga kag kaiping nga mga barangay.

Suno kay Tablate, wala sila sang kontrol sa IDJ bangud sa idalom na ini sang Bureau of Jail Management and Penology (BJMP).

Makasulod lang ang taga-PDEA sa IDJ kun may himuon nga greyhound operation kag gin-imbitar sila nga mag-upod sa pag-check sa mga selda.

Mas makapaayo suno kay Tablate kun ang pamunuan sang IDJ ang pasiktuhon kon sin-o ang nagtakod sang amo nga device.

Matambong si Tablate sa committee hearing nga ginpatawag sang provincial board sa Lunes agud maathagan ang publiko sa isyu.