Mga poste sang PECO, ipa-auction sang City Government bangud sa wala nabayran nga real property tax

By: Aine Grace Bravo | November 11, 2019

via Hotline

Iloilo City — Nagalab-ut sa P106,881,685.33 ang lowest bidding price para sa 20,000-30,000 ka mga poste sang Panay Electric Company.

Ini ang ginpahibalo sang City Treasurer’s Office (CTO) sa natalana nga pag-auction sa mga poste sang PECO sa Disyembre 12 bangud sa wala mabayaran nga real property tax.

Nagalab-ut naman sa P214 million ang total market value sang mga poste. Halin 2006 tubtub 2016 nga mga poste ang gin-assess sang CTO nga dapat buhisan.

As of October 2019, naglab-ut sa P98,295,854 ang balayran nga RPT sang PECO, lakip na ang mga penalties kag iban nga fees.

Ginsukot sang city government sang RPT ang PECO base sa desisyon sang Supreme Court sang 2015 nga puwede mabuhisan sang LGU ang mga poste sang public utility.

Ang highest bidder dapat nga magbayad gilayon sa adlaw sang auction.

Samtang ginpahayag ni Mr. Roel Castro, presidente sang MORE Electric and Power Corp., nga interesado sila nga mag-intra sa bidding ilabe na kun makabenipisyo sa mga konsumedor. Pero sa subong suno sa iya, ginapatun-an pa nila sa ila abogado kun puwede maka-intra sa bidding kag kun ano ang mga implications sini sa ila gin-file nga kaso.

Imposible naman suno kay Castro nga mag-entra sa bidding ang PECO bangud may balayran pa sila sa city government.