Ordinansa batuk sa pagsuksok sang tabon sa nawong sang motorista pasulod sa Don Esteban, Lapuz, nag-agi sa public hearing –barangay kagawad
By: Aine Grace Bravo | November 11, 2019
via KhenJo Terco
Iloilo City — Ginreklamo sa Office of the Ombudsman sang nagpakilala nga si Mark John Gensanio ang ordinansa sa Barangay Don Esteban, Lapuz nga nagabawal sa mga nagasulod sa barangay nga magsuksok sang helmet, face-mask, ukon bonnet, nga nagatabon sa guya sang mga nagasakay sa motorsiklo.
Base sa reklamo ni Gensanio, wala nag-agi sa public hearing ang pagdihon sang ordinansa nga nakatuga sang indi pag-intiendihanay sang mga residente kag sang mga nagalabay sa barangay.
Ginpanginwala naman ni Kagawad Elfren Cenayo, chairman sang Peace and Order Committee sang barangay, ang akusasyon ni Gensanio.
Suno sa iya, nag-agi sa ensakto nga proseso ang pagdihon kag pagpatuman sang nasambit nga ordinansa.
Katuyuan sini nga ma-identify ang mga nagasakay sa motorsiklo nga nagasulod sa ila barangay. Bangud man ini sang asud-asod nga kaso sang pagpamatay sang riding-in-tandem nga wala makilalal-an ang mga suspetsado.
Gin-athag man ni Kagawad Cenayo nga indi man kinahanglan nga ubahon gid ang helmet kun magsulod sa barangay.
Pwede man suno sa iya nga pasakaon lang ang tabon agud makita ang itsura sang nagasuksok.