Anay Kapitan sa Maasin nga nakuhaan sang granada kag iban pa nga kagamitan sa ginhimo nga raid sa iya balay, ginadudahan nga may koneksyon sa NPA

By: JoMaque | Nobyembre 12, 2019, 9:43am

Iloilo — Ginadudahan nga may koneksyon sa New People’s Army ang ex-punong barangay nga nakuhaan sang granada kag iban pa nga kagamitan sa raid sa Barangay Bolo, Maasin sang Dominggo, Nobyembre 10.

 Suno kay Police Regional Office 6 spokesperson Lieutenant Colonel Joem Malong, suspected liaiason officer ukon nagaserbe nga taytay sang mga rebelde kag wala ginhingadlan nga mga pulitiko si anay Punong Barangay Herman Alessa.

Kabahin suno kay Malong si Alessa sang Baluy Platoon, Central Front sang Komiteng Rehiyon Panay kag anay team leader sang Propaganda Organizing Team.

 Subject sang search warrant nga ginserbe kay Alessa ang .45 caliber pistol kag .38 caliber revolver, apang tag-isa ka granada, rig belt, ammo holster, baton holster, tear gas holster kag iban pa nga gamit ang na-recover.

Gin-subject sa police operation ang anay punong barangay matapos nakabaton sang report ang mga pulis halin sa komunidad nga nagapalupok siya sang pusil kun mahubog.       

Wala pa makahatag sang pahayag si Alessa nga preso sa Maasin Police Station.