Coastal barangays sa Nueva Valencia, Guimaras, nagpanghanda sa scenario sang tsunami sa ginhimo nga earthquake drill
By: Aine Grace Bravo | November 14, 2019
via Aljohn Torreta
Guimaras — Natestingan ang kahanda sang coastal barangay sa Nueva Valencia kun may tsunami nga matabo.
Pag-igo sang tsunami nga gin-trigger sang magnitude 8.2 nga linog ang nangin scenario sang 4th Quarter Nationwide Simultaneous Earthquake Drill kaina sang aga.
Suno kay Office of the Civil Defense (OCD) 6 Disaster and Risk Reduction Division chief Ma. Aletha Nogra, madinalag-on ang drill sa Sitio Sumirib, Barangay La Paz, Nueva Valencia nga amo ang host sang drill sa Western Visayas.
May 22 ka barangay ang Nueva Valencia, 17 diri ang coastal barangays lakip ang Barangay La Paz.
‘MABUDLAY, PERO AYOS LANG’
Lakip sa nag-evacuate ang 83-anyos nga si Milagros Natura bitbit ang iya tungkod kag ginagiyahan man sang iya bata.
Suno kay Natura, bisan mabudlay sa iya sitwasyon, nagpasakop siya sa aktibidad bangud importante nga nakahibalo sila kun ano ang ubrahon kun may kalamidad kasubong sang tsunami.
Ang tsunami ang isa sa mga mahimo epekto sang linog kun magluntad ini sa idalum sang dagat.
Malapit ang Brgy. La Paz, Nueva Valencia sa Negros Trench kag naga-atubang man sa open sea rason prone sa tsunami.
Ginabuligan sa pag-evacuate ang mga Persons With Disabilities, nagabusong, mga iloy nga may dala nga lapsag kag mga kabataan.
May mga dala man nga ‘go bag’ ang mga nag-evacuate.
Suno kay Rhodora Temporado, lakip sa mga kaundan sang iya bag ang bayo, flashlight, tinapay kag ointment.
May mga residente man nga nagdala sang importante nila nga mga dokumento.
‘NAG-EVACUATE, GIN-ACCOUNT’
May tatlo ka evacuation areas sa lugar nga gin-classify ang mga barangay officials.
Antes ang drill, na-orient na ang mga residente kun diin sila makadto nga evacuation area.
Ini ang i-observe man kun may kalamidad suno kay La Paz Punong Barangay Veronica Ortiz.
Suno kay Ortiz, gina-orient gid niya ang mga residente kun ano ang himuon ilabe na nga posible sila maapektuhan sang tsunami.
Gin-account naman sang natungdan nga opisyal sa barangay ang mga residente nga nag-evacuate.
Ginasiguro nga wala sang nabilin sa coastal area agud malikawan ang casualty.
Nagserbe nga evaluators ang mga representante sang nagkalain-lain nga ahensiya sang gobyerno kag NGO’s nga miembro sang Regional Disaster Risk Reduction and Management Council.