Mayor Jerry Treñas, kumpyansa nga makabulig sa siyudad ang expertise ni former PECO VP for Operations Engr. Randy Pastolero nga gin-appoint bilang EA for Power

By: JoMaque | Nobyembre 14, 2019, 8:31am

Iloilo City – Nagapati si Mayor Jerry Treñas nga makabulig ang expertise ni Engr. Randy Pastolero, anay Vice President for Operations sang Panay Electric Company, sa problema sa elektrisidad sa siyudad.

Ini ang pahayag ni Treñas matapos gin-appoint si Pastolero bilang Executive Assistant for Power sang Iloilo City Government.

Suno kay Treñas, may mandu na siya kay Pastolero sa iya mga dapat obrahon, lakip ang paghimos sa mga ‘spaghetti wires’ sang Panay Electric Company kag Telecommunication lines nga delikado.

Solusyunan man ni Pastolero ang mga poste sang PECO kag Telcos nga wala gihapon nakuha sa mga dalanon nga ginpalapad.

Mabulig man siya agud madasig nga makuha sang city government ang share halin sa Department of Energy (DOE) bilang host sang power plants.

Gin-athag sang alkalde nga gintanyag niya ang position kay Pastolero.

Ginpasiguro ni Treñas nga indi makatuga sang konflikto ang bag-o nga position ni Pastolero sa anay niya employer.