Adoption rate sang mga layaw nga ido, manubo — City Veterinarian

By: JoMaque | Nobyembre 17, 2019, 10:37am
via Aksyon Hotline

Iloilo City — Manubo ang adoption rate sang mga layaw nga ido nga gina-custody sang City Veterinarian’s Office (CVO).

Gin-ako ni City Veterinarian Dr. Tomas Forteza nga base sa iya eksperyensya, sa 100 ka mga stray dogs nga ila ma-custody, maswerte na nga may duha nga ma-adopt.

Nagapili man suno sa iya sang ido ang mga luyag mag-adopt.

Temporaryo nga ginabutang sang CVO sa cage ukon ginalawig sa ila opisina ang mga layaw nga ido.

Gin-athag ni Forteza nga halin sang una, luyag niya ang pagpa-adopt sang mga layaw nga ido sa baylo nga ipaidalum sa mercy killing.

Pero malaka suno sa iya nga may naga-adopt sa sapat nga ila gina-custody.

Magluwas sini, wala man sang pundo ang city government para sa pagkaon sang mga stray dogs.

Ginpahayag ni Forteza nga sa sulod sang tatlo ka adlaw nga wala sang may mag-claim ukon mag-adopt sa ido, ipaidalum ini sa mercy killing.

Gin-engganyo ni Mayor Jerry Treñas ang publiko nga mag-adopt sang mga stray dogs nga madakpan sang CVO.

Ang plano kasunod man sang reports nga ginakaykay sang stray dogs ang mga tanum sa siyudad.

Gin-athag naman ni Forteza nga indi kuntani mangin problema ang mga layaw nga ido kun responsable lang ang mga pet owners.