(UPDATE) Amay sang 17 anyos nga solterito nga napatay sang na-hit-and-run sa Sta. Barbara, handa magpa-areglo sa driver sang pick-up

By: Aine Grace Bravo | November 18, 2019

via Hotline

Sta. Barbara, Iloilo — Mapa-areglo si Reynaldo Subebe sa driver sang pick up nga nag-hit-and-run sa iya 17-anyos nga anak nga si John Mark sang Nobyembre 16 sang gab-i sa Barangay Buyo, Sta. Barbara.

Ini ang inisyal nga pahayag sang amay pero naka-depende gihapon ini suno sa iya sa ila ma-istoryahan.

Ini bisan wala pa gihapon nagguwa kag nakilala ang driver sang pick up nga nakabunggo sa iya anak resulta sang kamatayon sini.

Suno sa amay nga Subebe, pakadto sa computer shop ang iya bata agud maghampang sang nabungguan.

Nakita sa CCTV footage nga nagpahigad pa si John Mark pero nalab-ut gihapon sang salakyan.

Suno sa nakakita, “naglupad” si John Mark sang ginabanta 20 metros matapos nabungguan. Nagdiretso naman ang salakyan sa direksyon sang Mandurriao.

Sa kanal na nakuha sang amay ang biktima kag gindala sa Western Visayas Sanitarium sa Sta. Barbara.

Napatay ang biktima sang Nobyembre 17 sang kaagahon.

Suno kay Barangay tanod Reynaldo Sobremisana, nakalabay pa sa iya ang pick-up nga nagbunggo kay John Mark.

Nagpati pa si Sobremisana nga ido lang ang nabungguan matapos siya nakabati sang lagapok.

Pero may nakita siya nga tsinelas sa karsada sang naglampuwas na ang pick-up gani iya gin-usisa.

Wala gid suno sa iya naka-preno ang salakyan.

Nagapati si Sobremisana nga naka-inom ang driver bangud naga-esi ang dalagan sang salakyan.

Ginabanta sa 80 tubtub 90 kph ang dalagan sang pick up suno sa barangay tanod.