Asud-asod nga shooting incidents sa siyudad, posible kahimuan sang organized group – PRO 6
By: JoMaque, Nobyembre 19, 2019, 10:37am
Iloilo City — Posible kahimuan sang organized group ang asud-asod nga shooting incidents sa siyudad.
Suno kay PRO 6 Spokesperson Lt. Col. Joem Malong, may posibilidad nga organisado ang mga suspetsado sa pagpangtiro sa La Paz kag Arevalo bangud may pattern ang paghimo nila sang krimen.
Lunsay ginsulod sang mga suspetsado ang balay sang mga biktima kag kaagahon sang ginhimo ang krimen.
Gina-imbestigaran pa sang mga pulis ang background sang mga biktima agud makilala ang mga suspetsado kag matumod ang motibo sa krimen.
Una na ginpahayag ni Iloilo City Police Office Director Col. Martin Defensor Jr nga drug surrenderer ang dental technician nga si Angelito Yee nga gintiro-patay sa Brgy. Gustilo, La Paz sang Nobyembre 15.
Pinakaulihi nga natiruhan si Allan Taso sa Brgy. Sto. Niño Sur, Arevalo pasado ala una kaina sang kaagahon.
‘ALARMING’
Alarming ang asud-asod nga shooting incidents sa siyudad suno kay Malong.
Pabaskugon naman sang mga pulis ang visibility kag intelligence agud malikawan ang kasubong nga insidente.
Naga-conduct man sang Enhance Managing Police Operations ang ICPO sa pag-imbestigar sang mga kaso.
Paagi sa lihok, ma-imbestigaran sang mas madalum ang mga kaso kag ma-angut man sa iban pa mga insidente.