City Veterinarian’s Office, may ginapanan-aw na nga solusyon sa problema sa mga layaw nga ido

By: Aine Grace Bravo | November 19, 2019

via Hotline

Iloilo City — May ginatan-aw nga win-win solution si city veterinarian Dr. Tomas Forteza bilang respeto sa mga naga-react sa iya pahayag nga ipa-idalum sa mercy killing ang mga layaw nga ido kun wala sang may ma-claim nga tag-iya.

Isa dire ka solusyon suno sa iya ang micro chip implant agud mahibaluan ang tag-iya sang mga stray dogs. Barato na subong suno sa iya ang micro chip implant kag pagbakal sang scanner bangud sang teknolohiya.

Sa pihak sini, gin-athag ni Forteza nga una gid niya nga ginakampanya ang pag-implementar sang Anti-Rabies Act sa diin may responsibilidad ang mga tag-iya sa pagpabulong kun may makagat ang iya hinuptanan.

Base sa record suno kay Forteza, isa sa mga nagapanguna nga rason sang human deaths sa Western Visayas ang rabies. Magluwas pa ini sang madamo nga aksidente sa motorsiklo nga involved ang mga layaw nga ido.