Dalagita, nagreklamo nga gintuyo pasakyon sang mga lalaki nga nakasakay sa van sa La Paz

By: JoMaque, Nobyembre 19, 2019, 10:38am

La Paz, Iloilo City – Nagreklamo ang 13-anyos nga dalagita nga gintuyo siya pasakyon sang mga lalaki nga nakasakay sa van sa Lopez Jaena Norte, La Paz kahapon, Nobyembre 18.

Base sa reklamo ni Alyas Katherine, nagalakat siya pauli sa ila balay kag sang yara sa atubang sang Aglipay Church sa La Paz, nagbukas ang van nga nagapundo kag ginbutong siya sang isa sa tatlo ka mga sakay.

Suno naman kay Police Staff Sergeant Claren Baylon sang La Paz Police Station, mga las-kuwatro sang hapon natabu ang insidente base sa pahayag sang dalagita.

Ginpahayag sang dalagita nga ginbuligan siya sang lalaki nga nagasunod sa iya kag ginbutong siya gani nga nakapalagyo siya.

May bonnet suno kay Katherine ang nagbutong sa iya, samtang wala niya nakita ang hitsura sang duha pa ka lalaki sa front seat.

May pagtapungolay pa nga natabu suno sa dalagita sa mga lalaki nga sakay sa van kag sa lalaki nga nagbulig sa iya gani nakadalagan siya palagyo.

Naglakat suno sa iya ang van pakadto sa direksyon sang Jereos, samtang nagbalik siya pakadto sa La Paz Elementary School.

Ginpahayag ni Katherine nga wala pa siya nagdiretso sa police station bangud sa kulba, kag nagpanugid na lang siya sa iya tiyo sang nakapauli siya gani nga nagpa-blotter sila sa police station.

Nagpanawagan naman ang La Paz police sa lalaki nga nagbulig sa dalagita nga magpadulong sa police station agud makuhaan sang statement agud makahatag sang dugang nga detalye sa natabu.

Padayon ang imbestigasyon sang La Paz police.