Lalaki, patay sang natiruhan sang tanod sa Janiuay

By: Aine Grace Bravo | November 19, 2019

via Angel Mae Ciudad

Janiuay, Iloilo — Patay ang lalaki sang gintiro sang barangay tanod las 9:45 kagab-i, Nobyembre 18, sa Barangay Calmay, Janiuay.

Ginkilala ang napatay kay Jessie Camacho sang amo man nga lugar, may pilas sa tiyan.

Suno kay Police Staff Sergeant Raymond Dailan, imbestigador sang Janiuay MPS, ginsaway sang suspect nga si Federico Marbebe si Camacho bangud nagapanggamo.

Sa pahayag naman sang barangay tanod sa mga pulis, ginsaway niya ang biktima pero ginlagas siya rason nga nagpauli ang suspect sa ila balay kag nagkuha sang 12-gauge homemade shotgun.

Gintiro ni Marbebe ang biktima samtang nagapaguwa sa ila kudal nga may dala nga binangon.

Wala narekober ang pusil nga gingamit ni Marbebe.

Preso sa Janiuay Police Station ang suspetsado.