Tanod commander nga gintiro sang riding-in-tandem sa San Juan, Molo, nagapati nga mga pulis ang mastermind sa krimen

By: JoMaque, Nobyembre 19, 2019, 12:05pm

Iloilo City (UPDATE) – Nagakabalaka si San Juan, Molo tanod commander Limuel “Junjun” Villaruel sa iya seguridad kag sa security sang iya pamilya.

Kasunod ini sang pagtiro sang riding-in-tandem kay Villaruel sang Nobyembre 12 sang hapon.

Suno kay Villaruel, duha ka pulis ang iya ginapatihan nga nagsugo sa riding-in-tandem.

Ginbuyagyag ni Villaruel nga may ‘old grudge’ ang isa sa duha ka pulis sa ila pamilya. Isa lang sila ka barangay sang amo nga pulis. Suno kay Villaruel, ginpasakaan sang iya pamilya sang kaso administratibo ang nasambit nga pulis bangud sa pagkuga sa iya hinablos.

Wala naman nakahibalo si Villaruel sang agrabyo sang isa pa ka pulis, pero ginpahayag nga pareho lang sila sang unit sang una nga pulis.

Nakahanda si Villaruel nga isugid sa Molo police ang tanan agud masolbar ang pagtiro sa iya kag manabat ang mga suspek.

Gina-ayo lang ni Villaruel nga mapasiguro sang PNP ang iya safety kun makahatag na siya sang statement.