2 pulis, nasamaran matapos nagresponder sa inaway sang mga pamatan-on sa Sta. Barbara

By: Aine Grace Bravo | December 5, 2019

via Angel Mae Ciudad

Sta. Barbara, Iloilo — Naka-agom sang menor nga kasamaran sa lawas ang duha ka pulis nga natumba sang naglagas sa mga suspects nga nagpanggamo sa Bermejo St., Brgy. Zone II, Sta. Barbara las 12:40 kaina sang kaagahon, December 5.

Ginkilala ang napilasan kanday Police Corporal Gabriel Hembra Jr kag Police Staff Sergeant Oliver Sivella II nga lunsay miembro sang SWAT team sa IPPO.

Suno kay Police Major Reymond Celoso, hepe sang Sta. Barbara Police Station, ginlagas sang duha ka pulis kanday Zoar Jaffet Suarnaba, 19-anyos, kag Mark Louie Alemani, 19-anyos, nga involved sa inaway batuk sa duha ka menor-de-edad.

Nagbato ang duha ka suspects kag ginsipa kag gintiklod ang duha ka pulis rason nga natumba sila. Nagpalagyo kanday Suarnaba kag Alemani pero nadakpan.

Napasakaan na sang kaso nga direct assault upon an agent of a person in authority ang duha ka suspects.

Gin-turn over naman sa DSWD ang duha ka menor-de-edad nga involved man sa ginamo.