RDRRMC 6, natumod na ang mga kapaslawan sa pagresponde sa Iloilo Strait Tragedy nga nagbilin sang 31 casualties
By: JoMaque | Disyembre 5, 2019, 9:07am
Iloilo City — Natumod na sang Regional Disaster Risk Reduction and Management Council (RDRRMC) 6 ang mga kapaslawan sa pagresponde sa Iloilo Strait Tragedy nga nagbilin sang 31 ka mga napatay sang Agosto 3.
Gin-assess sang RDRRMC 6 ang Emergency Operations Center, Cluster, kag Incident Management Team nga nagresponde sa pagkulob sang tatlo ka mga motor bancas.
Sa Emergency Operations Center, na-obserbahan nga may confusion sa mga facilities nga gamiton kag wala man na-activate gilayon ang blue alert status ukon 24/7 nga monitoring sang sitwasyon.
Sa Cluster naman, wala nasunod ang RDRRMC Operation Center Standard Operating Procedure Manual, wala nahuman ang Regional Disaster Response Plan kag indi man maayo ang pagdumala sang pagpanghatag sang pagkaun halin sa pribado nga sektor.
Sa Incident Management Team, kuntani ang Philippine Coast Guard ang nangin Incident Commander.
Ang madugay nga pag-activate sa Incident Management Team ang rason sa delayed man nga pagresponde.
Dugang diri, wala man naka-coordinate sang maayo ang mga ahensiya sa pagkuha sang impormasyon sang mga survivors.
‘DAPAT I-CORRECT’
Nanindugan naman si RDRRMC 6 Chair kag Office of the Civil Defence 6 Director Jose Roberto Nuñez nga kinahanglan i-correct ang mga nakita nga kapaslawan agud malikawan nga masulit.
May gintukod nga technical working group nga maga-address sa tanan nga mga kinahanglan i-correct.
Nagpanawagan man si Nuñez sa mga Local Government Units nga magbakal sang dalagko nga sakayan pandagat agud gilayon nga makaresponde kun may insidente.
Ginpabutyag sang opisyal nga indi na magtudlu-anay kun sin-o ang may sala kag sa baylo, mag-move on na lang.
Nagapadayon ang joint investigation sang Philippine Coast Guard kag Maritime Industry Authority sa insidente.