(UPDATE) Construction worker nga na-hit-and-run sa Oton, napatay kaina sang kaagahon

By: Aine Grace Bravo | December 6, 2019

via Francisco Enar

Iloilo City — Napatay samtang ginabulong sa ospital ang construction worker nga na-hit and run sa Barangay Pulo Maestra Vita, Oton sang Disyembre 3.

Las-dos kaina sang kaagahon, Disyembre 6, napatay sa Western Visayas Medical Center si Ronald Nieves, 30-anyos sang Barangay Dagsaan, Buenavista, Guimaras.

Gin-operahan pa sa ulo si Nieves, pero nagpabilin nga comatose tubtob napatay kaina.

Nagatabuk si Nieves sang nabungguan sang salakyan. Nagtabog ang biktima sang ginabanta 50 ka metro, pero wala gid nagdulog ang nakabunggo sa iya.

Nakita sa CCTV footage sa crossing sang Jibao-an, Pavia nga pakadto sa Ungka II, Pavia ang salakyan nga puti kag buka na ang windshield. Wala sa gihapon makilala ang driver nga nag hit-and-run sa biktima.

Nagapangayo sang bulig ang live-in partner ni Nieves sa sin-o man nga may ihibalo sa natabu nga magpahibalo sa police agud mahatagan hustisya ang biktima.