Awto nga naga-anggid sa naka-hit-and-run sa construction worker sa Oton nga nagresulta sa pagkapatay sang biktima, nakita sa talyer sa Zarraga

By: Aine Grace Bravo | December 7, 2019

via Hotline

Zarraga, Iloilo — Nakita sa talyer sa Crossing Bangga Bante, Brgy. Jalaud Norte, Zarraga ang awto nga ginapatihan naka-hit and run sa construction worker sa Brgy. Pulo Maestra Vita, Oton sang Disyembre 3 sang gab-i.

Pasado las otso kagab-i, Disyembre 6, nakabaton sang tawag ang Aksyon Radyo Iloilo halin sa concerned citizen nga nagapahibalo nga may gindala nga salakyan nga naga-anggid sa salakyan nga iya nakita sa CCTV footage nga gin-post sa Facebook page sang Aksyon Radyo.

Gilayon nga ginkadtuan sang Oton police subong nga aga ang talyer upod ang testigo nga si alyas Toto agud usisaun ang salakyan matapos nabaton ang impormasyon nga gin-relay sang Aksyon Radyo Iloilo.

Suno sa naga-obra sa talyer, mga las 8 kagab-i, gindala ang salakyan nga Hyundai Eon nga coral white.

Ginbilin lang sa sulod sang talyer suno sa iya ang salakyan bangud sirado na sila sa amo nga oras.

Suno naman sa testigo nga si Toto, may anggid sa awto nga nakabunggo patay kay Ronald Nieves ang salakyan nga nakita niya sa talyer.

Nakita ni Toto nga nagapatabok ang biktima sang nabungguan sang salakyan.

Ginabanta suno sa iya sa napulo ka dupa ang gintabugan sang biktima.

Napatay si Nieves sa ospital sang Disyembre 6 sang kaagahon.

Nagdiretso lang suno sa iya sa pagdalagan ang nakabunggo nga salakyan gani wala niya makuha ang plate number.

Madasig man ang dalagan sang amo nga salakyan suno kay Toto.

Suno naman kay PMSGT Eddie Tordesillas sang Oton Police Station, may posibilidad nga ang salakyan nga ara sa talyer amo ang nakabunggo sa biktima.

Ginatinguhaan pa nila nga ma-contact ang tag-iya sang salakyan agud mahibaluan kun sin-o ang driver sang tiun nga nabungguan si Nieves.

Base sa ila impormasyon ginguyod lang ang salakyan pasulod sa talyer.

Ginkuha sa Brgy. Anilao,Pavia ang salakyan suno kay Tordesillas.