Driver sang salakyan nga ginapatihan naka-hit and run sa construction worker sa Oton, nakilala na

By: JoMaque | Disyembre 8, 2019, 8:39am

Iloilo — Nakilala na ang driver sang Hyundai Eon nga ginapatihan sang Oton police nga naka-hit and run sa construction worker nga si Ronald Nieves, sang Guimaras sa Pulo Maestra Vita, Oton sang Disyembre 3 sang gab-i.

Ginkilala sang Oton police ang driver nga si Jessie Bagaan, 37 anyos sang Capaliz Dumangas.

Pasado las 8 sang gab-i sang Disyembre 3, na-capture sang CCTV camera ang pag-park sang amo nga salakyan sa boarding house sa Purok 4, Pavia, pila ka minutos lang matapos na-hit and run si Nieves.

Makita sa CCTV footage nga wasak ang windshield sang Hyundai Eon.

Makita man nga nagpanaug sa salakyan ang driver nga si Bagaan kag nagbutang sang car cover.

Nagatiner sa nasambit nga boarding house ang tiya ni Bagaan.

Nabukaran naman sang landlord sang Facebook post sang Aksyon Radyo Iloilo may kaangtanan sa natabo kay Nieves gani nagduda siya sang nakita ang natabunan nga salakyan nga ginbilin sa compound sang boarding house.

Ginbuksan sang landlord ang car cover kag nakita niya nga wasak na ang windshield kag gupi ang hood sang salakyan.

Gintawgan sang landlord si Bagaan kag ginhambalan nga kuhaon ang salakyan.

Disyembre 6 sang gab-i, may concerned citizen nga nagtawag sa Aksyon Radyo Iloilo kag nagpahibalo nga nakita niya sa talyer sa Bangga Bante, Jalaud Norte, Zarraga ang amo nga salakyan.

Gilayon man nga ginpahibalo sang Aksyon Radyo ang Oton police kag ginkadtuan kahapon sang aga, Disyembre 7 ang talyer upod ang testigo agud makita ang salakyan nga may yara pa sang car cover.

Ginatudlo nga naga-anggid sa salakyan nga nakabunggo-patay kay Nieves.