Driver sang salakyan nga nakabunggo-patay sa construction worker sa Oton, nag-surrender pinaagi sa Aksyon Radyo Iloilo

By: JoMaque | Disyembre 9, 2019, 8:55am

Iloilo — Nag-surrender pinaagi sa Aksyon Radyo Iloilo ang driver nga naka-hit and run nga nagresulta sa pagkapatay sang construction worker nga si Ronald Nieves sang Guimaras sang Disyembre 3 sang gab-i.

Suno kay Jessie Bagaan, 37-anyos, negosyante sang mga finished construction supplies, wala siya sang tuyo nga magpalagyo pero bangud sang kakulba niya, wala siya gilayon nag-surrender.

Indi na madumduman ni Bagaan kun ano ang natabo pagkatapos niya nabungguan si Nieves bangud man sa kakulba.

Sang ginpamangkot sang Aksyon Radyo Iloilo kun ngaa gintago niya ang iya salakyan sa boarding house sang iya tiya sa Pavia kag kun ngaa ginpadala niya ang iya salakyan sa talyer, nagpamalibad na nga magsabat si Bagaan.

Ginpahayag ni Bagaan nga desidido siya nga buligan sa galastuhon ang pamilya sang biktima kag atubangon ang kaso nga ipasaka batok sa iya.

Suno naman Atty. Joms Lamparero, legal counsel ni Bagaan, nagtawag sa iya si Bagaan kaina sang aga agud magpangayo sang bulig.

Ini ang rason kun ngaa nagdesisyon man sila nga mag-coordinate sa Aksyon Radyo Iloilo agud mapa-surrender ang iya kliyente.