NAPOLCOM 6 Director Joseph Celis, nanindugan nga indi dapat mag-mask ang mga pulis sa regular operation lakip sa buy bust operation

By: JoMaque | Disyembre 15, 2019, 8:10am

Iloilo City — Nanindugan si National Police Commission ukon NAPOLCOM 6 Director Joseph Celis nga indi dapat mag-mask ang mga pulis sa ila regular operation lakip sa drug operation.

Suno kay Celis, kinahanglan naka-uniporme ang pulis kag kinahanglan man nila magdeklarar kun ano ang ila tinutuyo sa subject kasubong sang pagserbe sang warrant of arrest kag search warrant.

Sa mga covert operations naman ukon sa mga kahigayunan nga gina-aresto ang subject sa paghimo sa akto sang krimen ukon paglapas, mahimo nga indi maka-uniporme ang pulis apang kinahanglan wala sang tabon ang iya guya.

Dugang niya, kinahanglan man magpakilala sang pulis sa subject.

Sandig sa PNP Manual of Operations, kinahanglan magsuksok sang prescribe uniform ang pulis nga nagaka-angay sa police operation.

Ang PNP uniform may 13 ka sahi nga ginabugusan sang bike uniform,athletic uniform,black tropical fatigue, camouflage green FSU, full dress blue kag full dress white, GOA Type A, GOA Type B, GOA Type C, green pixelized printed FSU, mess jacket, patrol uniform, search and rescue uniform, kag tourism police uniform.

Base naman sa PNP Revised Manual on Anti Illegal Drugs Operations and Investigations, ang poseur buyer lang ang ginapahanugutan nga pulis nga mag-under cover para magbakal sang illegal nga druga sa pagdakop sa subject.