Amay nga ginreklamo naghimulos sa iya 19-anyos nga bata sa Estancia, napasakaan na sang kaso

By: JoMaque | Disyembre 16, 2019, 9:24am

Iloilo — (UPDATE) Napasaka na ang kaso batuk sa 44-anyos nga amay nga ginreklamo sang iya 19-anyos nga bata nga babaye nga naghimulos sa iya sa Estancia.

Suno kay Police Major Rene Obregon Jr., hepe sang Estancia Police Station, ginpasaka ni alyas Nene ang kaso sa Iloilo Prosecutor’s Office sang Disyembre 14.

Paglapas sa Republic Act 10591 ukon Comprehensive Firearms and Ammunition Regulation Act kag attempted rape ang ginpasaka nga kaso.

May nakuha nga pusil sa amay sang gindakop siya.

Base sa reklamo ni Nene, 2013 sang ginhimuslan siya sang iya amay kag nasundan pa tubtob nagbusong siya kag nagbata.

Wala nagpanugid ang dalaga matapos ginpahog sang iya amay nga pamatyon sila.