Iloilo City: (UPDATE) Pulis nga ginreklamo nagkuha sang kwarta sang menor-de-edad sa Molo, gin-relieve pero indi paghingadlan sang ICPO Director
By: Aine Grace Bravo | December 16, 2019
via Aljohn Torreta
Iloilo City — Gin-relieve ni Iloilo City Police Office Director Martin Defensor Jr. ang pulis sa Molo Police Station nga ginreklamo nagkuha sang kwarta sang 13-anyos nga dalagita pagkatapos sang raid sa Barangay Calumpang, Molo.
Suno kay Defensor, gin-relieve pakadto sa Accounting Section sang ICPO ang wala gihingadlan nga pulis sugod sang Disyembre 13.
Magabantay sa gate kag magapaninlo sa comfort room ang natungdan samtang wala pa nadesisyunan ang reklamo batuk sa iya.
May probable cause nga nakita ang Investigation and Detective Management Section sa reklamo batuk sa pulis rason gin-relieve siya.
Maga-untat naman ang IDMS sa ila imbestigasyon kag isumiter ang ila natipon nga impormasyon kag mga ebidensiya sa National Police Commission 6.
Disyembre 13 sang gin-updan sang mga imbestigador ang tagreklamo nga si alyas Inday upod ang iya iloy pakadto sa NAPOLCOM 6 para magreklamo.
Wala pa na-file ang kaso sang Disyembre 13 bangud wala pa napreparar ang affidavit sang tagreklamo.
‘I DO NOT WANT TO NAME’
Nakilala sang pulis ang ginareklamo nga pulis apang indi siya paghingadlan ni Defensor.
Ginrason sang police official nga indi na niya mabawi ang iya mangin pahayag kun ma-acquit lang ukon mapamatud-an nga wala sang sala ang ginareklamo nga pulis.
Dugang niya, apektado ang pamilya sang ginareklamo nga pulis.
Una na ginpahayag ni Defensor nga hingadlan niya ang ginareklamo nga pulis kun may ‘culpability’ ukon makit-an nga balasulon gid man ang ginareklamo.
‘WE HAVE TO RESPECT THAT’
Ginatugyan naman sang Police Regional Office 6 kay Defensor ang paghingalan sa ginareklamo nga pulis.
Suno kay PRO 6 Spokesperson Joem Malong, kun mahimo pa lang, wala nila ginahingadlan ang ginareklamo nga mga pulis bangud nagapadayon pa ang imbestigasyon.
Dugang niya, ginaproteheran nila ang ginareklamo nga pulis samtang nagapadayon ang imbestigasyon agud malikawan ang ‘trial by publicity’.
Nagadepende sa commander kun hingadlan nila ang ginareklamo nga pulis suno kay Malong.
Mahingadlan ang ginreklamo nga mga pulis kun may desisyon na ang kaso.
Wala sang specific nga guideline ang Philippine National Police natuhoy diri.