Masobra isa ka tuig nga bata nga lalaki nga nakita sa patyo sa arevalo kaina sang kaagahon, gin-turn over sa pamilya sang amay sang bata

By: JoMaque | Disyembre 18, 2019, 10:52am

Iloilo City – (UPDATE) Gin-turn over sang City Social Welfare and Development Office Arevalo District ang masobra isa ka tuig nga bata nga lalaki nga nakit-an sa private cemetery nga basa kag nagahilibi-on sa Arevalo kaina sang kaagahon sa pamilya sang amay sang bata.

Naghiwat sang case conference kaina sang aga ang taga-CSWDO Arevalo District, upod sa iloy kag amay sang bata kag pamilya sang mag-live in partner.

Nagtambung man sa case conference ang mga barangay officials sang Sto. Niño Norte, Arevalo.

Base sa assessment sang CSWDO, indi makasarang mag-atipan sang iya bata ang iloy nga si Alyas Nene, 36-anyos, bangud may deperensya sa paminsaron suno sa iya amay nga si Minyong.

Suno kay Zadi Belesario nga OIC District Social Worker sang CSWDO Arevalo District, ginpasikto nila ang pamilya ni Nene pero wala sang nagpabutyag nga makasarang sa pag-atipan sa bata. Bangud sini, ginpakamaayo sang CSWDO nga i-turn over ang bata sa utod sang biological father.

Pero sa pagpangusisa sang Aksyon Radyo, ginhatag man sang tiya ang bata sa 20-anyos nga bata ni alyas Nene nga naga-istar sa City Proper.

Nagpasalig ang CSWDO nga ila iga-check ang sitwasyon sang bata.

Ginpanugyanan naman ni Belesario si alyas Nene nga magbalik sa ila opisina agud ma-skedyul ang pagpatan-aw sa iya sa psychiatrist.