PRO 6 kag Philippine Army, preparado sa posible pag-atake sang npa kadungan sang 51st anniversary sang CPP sa Disyembre 26

By: JoMaque | Disyembre 18, 2019, 9:11am

Iloilo – Preparado ang Police Regional Office 6 kag Philippine Army sa posible pag-atake sang New People’s Army kadungan sa ika-51 nga anibersaryo sang Communist Party of the Philippines sa Disyembre 26.

Suno kay Captain Cenon Pancito III, Spokesperson sang 3rd Infantry Division sang Philippine Army, padayon ang ila pursuit operations batuk sa mga rebelde.

Magluwas diri, ginapabaskog man sang mga soldado ang ila depensa sa kampo.

Suno naman kay PRO 6 Spokesperson Joem Malong, magluwas sa pag-operate sa mga lugar nga may sightings sang mga rebelde, mas ginapasangkad man sang mga pulis ang ila intelligence gathering.

Dugang diri, ginapabakod man ang depensa sa mga police stations.

May mga pulis nga gin-deploy sa convergence areas kasubong sang mga simbahan kag plazas.

Nagapanawagan naman ang mga pulis kag soldado sa publiko nga padayon magkooperar sa ila kag maghatag sang impormasyon kun may makaduluda nga personalidad sa ila lugar.

Napuhag ang mga pumuluyo sa lima ka mga barangay sa nabukid nga bahin sang Tubungan kag duha ka mga barangay sa Igbaras matapos nagpangtapik sang posters kag streamers kag nagpanglapta pa sang leaflets ang New People’s Army sang Disyembre 16..