Menor nga nagreklamo ginkuhaan kwarta sang pulis pagkatapos sang raid sa Molo, nagpasaka na sang kaso criminal kag administratibo batuk sa pulis

By: JoMaque | Disyembre 21, 2019, 9:20am

Iloilo City (UPDATE) – Ginpasakaan na sang kaso criminal kag administratibo sang 13-anyos nga dalagita ang pulis nga ginreklamo niya nagkuha sang iya kwarta pagkatapos sang raid sa Barangay Calumpang, Molo.

Ginkumpirmar ni Lasyon, iloy sang tagreklamo nga si alyas Inday, nga nag-file sila sang kaso administratibo sa National Police Commission (NAPOLCOM) 6 samtang sa Iloilo City Prosecutor’s Office naman gin-file ang kaso criminal batuk kay PSSg Wilben Nombres.

Suno kay Police Inspector 2 Giovanni Pamonag sang NAPOLCOM 6, i-evaluate nila ang ginpasaka nga kaso batuk kay Nombres sa ila opisina kun may jurisdiction sila natuhoy diri.

Sandig sa NAPOLCOM Memo Circular 2016-002, ipaidalum sa pre-charge investigation ang reklamo pagkatapos sang evaluation.

Kun makitaan sang probable cause, i-refer naman ini para sa summary hearing agud mapasabat ang ginareklamo nga pulis tubtob nga madesisyunan ang kaso.

Nagadepende naman sa fiscal sa Prosecutor’s Office nga gin-assign sa pag-evaluate sang kaso criminal kun magapadayon ang kaso sa korte.

Una na ginpahayag ni alyas Al, magulang ni Inday, nga nagpasaka sila sang kaso agud mahatagan sang hustisya ang pagkuha sa indi magnubo P23,000 nga kwarta sang iya manghod.

Gin-imbestigaran sang Iloilo City Police Office ang reklamo ni Inday apang gin-untat nila ini.

Isumiter sang Investigation and Detective Management Section sang ICPO sa NAPOLCOM 6 ang ila natipon nga impormasyon agud malikawan ang forum shopping.

Gin-relieve halin sa Molo Police Station pakadto sa Holding and Accounting Unit sa Iloilo City Police Office si Nombres.