(UPDATE) Bangkay sang lalaki nga nasapwan sa Murcia, Negros Occidental nga may tattoo nga “Melvin Odicta” kag “Christine,” tumandok sang Estancia, Iloilo

By: Aine Grace Bravo | December 21, 2019

via Aksyon Radyo Bacolod

Neg. Occ. — Nakilala na ang bangkay sang lalaki nga nasapwan sa higad sang katubuhan sa Barangay Pandan Silos, Murcia, Negros Occidental sang Disyembre 14.

Suno kay PLT Frankie Paciente, deputy chief sang Murcia Police Station, ginkilala sang iya ang iloy ang bangkay kay Christian Diputado, 24-anyos nga tumandok sang Estancia, Iloilo pero temporaryo nga naga-istar sa San Carlos City.

Ginpahayag sang iloy nga si Merly nga Disyembre 13 naghalin sa ila balay si Christian kag wala na nakapauli tubtub ila nabalitaan nga may nasapwan nga bangkay nga may tattoo nga “Melvin Odicta” kag “Christine” sa Murcia.

Suno sa iloy, ginpa-tattoo ni Christian ang “Melvin Odicta” sang napreso siya sang anum ka bulan sa Estancia Police Station sa kaso nga pagpangawat.

Wala sang ideya ang iloy kun ano ang koneksyon sang iya bata kay the late PDEA-identified  drug group leader Melvin Odicta.

Wala man sang may matumod nga motibo ang iloy sa kamatayon sang iya bata.

Nasapwan si Christian nga nagapos ang duha ka kamot kag naputos sang packing tape ang ulo.