Multicab kag taxi, nagbunggu-anay sa idalom sang Infante flyover

By: JoMaque | Disyembre 23, 2019, 1:17pm

Iloilo City — Napilasan kag nagpalanakit ang lawas sang lima ka miembro sang pamilya Quesido sang nabungguan ang ila ginasakyan nga multicab sang taxi sa idalom sang Infante flyover subong nga kaagahon.

Sakay sa multicab ang mag-asawa nga Ronnie kag Dorris upod ang tatlo nila ka kabataan nga taga- Lambuyao, Oton kag padulong kuntani sa siyudad para magsimba.

Minor lang ang pilas sang magpamilya.

Ginpahayag naman sang taxi driver nga si Felipe Morenes sang Dumarao, Capiz kag nagamaneho sang LCC taxi, may nasugata siya nga salakyan nga masilaw ang suga rason nga wala natalupangdan ang multicab.

Nagapati si Morenes nga madasig ang dalagan sang multicab.

Nagpanindugan naman si Ronnie, driver sang multicab, mahinay lang ang iya dalagan. Natumba ang multicab.

Gindala sa ospital ang pila ka miembro sang magpamilya.