Iloilo City DRRMC, ginpa-idalum sa blue alert bangud sa Bagyo Ursula

By: JoMaque | Disyembre 24, 2019, 8:16am

Iloilo City – Ginpa-idalum ni Mayor Jerry Treñas sa “BLUE ALERT” ang Iloilo City Disaster Risk Reduction and Management Council matapos nalakip ang Iloilo sa mga lugar nga signal number 1 na bangud sa Bagyo Ursula.

Sa memorandum nga ginpaguwa ni Treñas subong nga adlaw, nakabutang nga kinahanglan preparahan kag aksyonan ang posible impact sang bagyo.

Ang BLUE ALERT nagakahulugan nga naka-standby na ang tanan nga Vice-Chairpersons, Cluster Leads, kag Unit Leads, kag ginapahanda sa posible nga deployment kun kinahanglan.

Ang CDRRMC naman, maga-monitor kag maga-coordinate sa mga concerned offices.

Samtang ginapa-activate ang Barangay Operations Center sang Barangay Disaster Risk Reduction and Management Committees (BDRRMCs) agud masiguro ang safety sang mga pumuluyo.

Para sa anuman nga emerhensya, mahimo makapakig-angut sa hotline numbers sang CDRRMC Operation Center sa 333-2333/333-3333/333-4333, 09190661554, 00998-903-4593, 0955-986-7404.