NPA, nag-ako nga sila ang nagpalupok sang IED sa salakyan sang mga pulis sa Tubungan

By: JoMaque | Disyembre 24, 2019, 9am

Tubungan, Iloilo – Gin-ako sang New People’s Army nga sila ang nagpalupok sang improvised explosive device (IED) sa salakyan sang mga pulis sa Barangay Male, Tubungan las-9:30 kahapon sang aga, Disyembre 23.

Suno kay Gibriela Tubungbanwa, Public Information Officer sang Napoleon Tumagtang Command-Larangan Dose sang NPA, ila grupo ang nagbutang sang IED bangud padayon ang ‘hulag’ sang PNP kag AFP sa ila area.

Pagpakita ini suno kay Tubungbanwa nga wala ginasunod sang PNP kag AFP ang gindeklarar nga ceasefire. Ginpabutyag pa ni Tubungbanwa nga nakahanda ang tanan nga unit sang NPA.

Suno naman kay Iloilo Police Provincial Office Spokesperson PMS Francisco Lindero, nagapanaug na kaina halin sa ibabaw sang bukid ang mga miembro sang Iloilo 1st Provincial Mobile Force Company matapos ginmanduan ni IPPO Director Col. Roland Vilela bilang pagsunod sa ceasefire nga nag-epekto subong nga adlaw.

Ginpahayag ni Lindero nga may mga pulis nga napilasan, pero menor man lang, kag na-damaged man ang ila salakyan.

Nagapati ang mga pulis nga pareho nga grupo man ang ila naka-engkwentro sa boundary sang Barangay Buloc kag Bato sa Tubungan sang Disyembre 21.