Driver sang motorsiklo nga nakabunggo sa taxi sang Enero 1 sang kaagahon, napatay sa ospital; taxi driver, nag-sorry

By: Aine Grace Bravo | January 2, 2020

via Hotline

Iloilo City — Nagapangayo sang pasensiya sa pamilya sang driver sang motorsiklo ang driver sang Kaolikhan taxi kasunod sang ila pagbunggu-anay sa North Avanceña, Molo sang Enero 1, pasado las-12 sang kaagahon.

Napatay kahapon man sang kaagahon samtang ginabulong sa ospital ang driver sang motorsiklo nga si Nazareno Pagayon II.

Ginpahayag ni Aries John Dabucon sang San Rafael, Mandurriao, nga indi niya hungod ang natabo bangud naglikaw lang siya sa mga palupok nga ginsindihan sa karsada.

Nakibot na lang si Dabucon sang gulpi may nagbunggo sa bumper sang iya taxi kag naghabok ang iya air bag.

Suno kay Dabucon, wala niya nakita ang nasugata nga motorsiklo bangud madasig ang dalagan sini kag madamol ang aso sang mga palupok.

Natabunan man suno sa iya ang iya hitsura sang naghabok ang air bag sang taxi rason wala niya natalupangdan ang mga nagatindog sa karsada sang nawarik niya pawala ang manibela.

Nagahingagaw pa kuntani si Dabucon nga makapauli sa iya pamilya para sa pagsug-alaw sang new year sang nadisgrasya.

Ginpabutyag ni Dabucon nga nakonsensya gid siya bangud sa natabo.

Gin-athag naman ni Dabucon nga wala siya nagpalagyo pagkatapos sang aksidente.

Nakita niya na lang nga ginalampusan sang mga residente ang windshield sang iya taxi kabangdanan nagpangayo siya sang bulig sa pribado nga awto nga naglabay kag nagpadul-ong sa police station agud mag-surrender.

Natalana pasakaan sang kaso si Dabucon.