Lalaki nga una gindudahan nga naglukso sa bubon, wala makita

By: Aine Grace Bravo | January 3, 2020

via Firingline

Iloilo City — Nabulabog ang mga residente sa subdivision sa Barangay Balabago, Jaro kahapon sang naglapta ang impormasyon nga posible naglumpat sa bubon si Jesmar Secorsecon, 56 anyos, tumandok sang San Joaquin.

Suno kay Delicia Pomares nga tiya sang live-in partner ni Secorsecon nga si Jennilyn Teruel, 46 anyos, nanotisyahan nila nga pirme masubo, wala na nagakaun kag nagapahubog na lang ang lalaki halin sang napatay ang iya live-in partner sang Christmas Day.

Nakita ang bisikleta ni Secorsecon nga napasandig sa kilid sang bubon mga 130 metros ang kalayuon halin sa ila balay gani ginpangita siya tubtob nga gin-check ang apat ka bubon nga nagatuparay pero wala sang nakita nga lawas.

Sanday Secorsecon kag Teruel ang halos 10 ka tuig na nga naga-upod suno kay Pomares.

Posible suno sa tiya nga na-depress si Secorsecon bangud tuman niya ka palangga si Teruel.