(UPDATE) Taxi driver, ginkasuhan na matapos nabungguan ang iya unit sang motorsiklo nga nagresulta sa pagkapatay sang driver

By: Aine Grace Bravo | January 3, 2020

via Hotline

Iloilo City — Napasakaan na sang kaso ang driver sang Kaolikhan taxi nga nabungguan sang motorsiklo sa North Avanceña, Molo sang Enero 1 sang kaagahon nga nagresulta sa pagkapatay sang driver.

Ginpasaka kahapon, Enero 2, ang kaso nga reckless imprudence resulting to homicide and damage to property batuk kay Aries John Dabucon, 29 anyos, sang Brgy. San Rafael Mandurriao.

Suno kay Mrs. Teresa Pagayon, iloy ni Nazareno Pagayon II, papuli na kuntani ang iya bata halin sa trabaho agud magselebrar sang bag-ong tuig upod sa ila sang natabu ang aksidente.

Tuman ang kasubo sang pamilya bangud si Pagayon lang ang ila ginasaligan. Siya man ang nagapaeskwela sa iya mga utod.

Magluwas kay Pagayon, may apat pa ka mga residente nga nadalasa sang taxi pero mga menor lang ang kasaraman.