Kahalitan sa agrikultura sang bagyo Ursula sa rehiyon naglab-ot sa P214-million

By: JoMaque | Enero 4, 2020

Iloilo City (UPDATE) — Naglab-ot sa P214.9-Million ang kahalitan sa agrikultura sa rehiyon sa paglaslas sang Bagyo Ursula suno sa Regional Disaster Risk Reduction and Management Council 6.

Sa data sang RDRRMC 6 nga ginpaguwa subong nga adlaw, P174.8-Million sa kabug-usan nga kantidad ukon kapin 80% sa kabug-usan nga kahalitan ang na-record sa Capiz.

Ginsundan ini sang Iloilo nga may P34-Million nga balor sang kahalitan, Aklan nga may P100,000, Negros Occidental P19,728 kag Antique nga may P6,057 nga balor sang kahalitan sa agrikultura.

P153.4-Million sa kabug-usan nga kantidad ang balor sang kahalitan sa humay, P12.4-Million sa mais, P10.4 Million sa iban nga crops , P34,053 sa iban nga mga crops kag P4.7-Million sa Agriculture Infrastructure.

Subject pa sa validation sang Department of Agriculture ang gin-report kahalitan sa agrikultura sa rehiyon.

Sa kabug-usan, naglab-ot naman sa 263,400 ka mga pamilya ukon 1.1-Million indibidwal sa rehiyon ang naapektuhan sa pagpanalasa sang bagyo Ursula.

26 ang gin-report napatay, 16 sa amo nga numero ang na-record sa Iloilo.