Mitsubishi Adventure, nagtakilid sang nabungguan sang awto sa La Paz

By: Aine Grace Bravo | January 4, 2020

via KhenJo Terco

Iloilo City — Nagtakilid kag nawasak ang windshield sang Mitsubishi Adventure sang nabungguan sang awto sa Nabitasan, La Paz, pasado las-dos kaina sang hapon.

Suno sa driver sang awto, halin siya sa Nabitasan kag padulong sa Diversion Road sang natabu ang aksidente pag-abot sa intersection malapit sa entrance sang Prime Estate Subdivision.

Gin-ako sang driver nga nagbalibad magpakilala nga wala niya natalupangdan ang Adventure nga halin naman sa direksyon sang General Luna Street kag pasulod sa subdivision.

Nabungguan sang awto ang likod nga parte sang Adventure rason nga nagtakilid.

Napilasan sa wala nga kamot ang driver sang Adventure. Nagupi naman ang ulo ang awto, apang wala sang nasamaran sa mga sakay.

Handa magpa-areglo ang driver sang Adventure sa driver sang awto.