Pagdula sang Kasadyahan Regional Cultural Competition sa Dinagyang 2020, wala epekto sa kahiwatan -DOT 6

By: Aine Grace Bravo | January 4, 2020

via Hotline

Iloilo City — Nagapati si Department of Tourism (DOT) 6 Regional Director Atty. Helen Catalbas nga wala sang epekto sa Dinagyang 2020 ang pagdula sang Kasadyahan Regional Cultural Competition.

Suno kay Catalbas, mas maayo nga mahatagan sang kahigayunan ang mga barangay-based tribes sa “Dagyang sa Calle Real” sa Sabado nga event kag matutukan man ang mga tribu nga madugay na nga wala nakapasundayag sa festival.

Mas maayo man suno sa iya nga ibutang ang Kasadyahan Festival sa iban nga bulan sang tuig agud may paabuton man nga dako nga event ang siyudad.

Sa pagkamatuod suno kay Catalbas, dapat kuntani may event kada bulan ang siyudad apang ginakahangaw-an niya nga maka-eksperyensya sang “sponsorship fatigue” ang mga sponsors.

Gin-athag ni Catalbas nga ara man gihapon sa line up sang mga officers sa management committee sang Dinagyang 2020 ang ahensya nga amo ang naga-promote sang festival.

Dugang niya, indi lang isa ukon duha ka bulan ginahimo sang DOT ang promotion sa festival kundi sige-sige bangud nagalakip dire ang promotion man sang mga tourist attractions sa Western Visayas.