(UPDATE) Mga ginikanan sang tatlo ka drummers sang Tribu Salognon nga napulpugan sa ulo sang ila trainer, akig sa natabu suno sa principal sang Jaro NHS

By: Aine Grace Bravo | January 4, 2020

via KhenJo Terco

Iloilo City — Naglain gid ang buot sang mga ginikanan sang mga estudyante nga napulpugan sang microphone sa ulo sang trainer sang Tribu Salognon sang Jaro National High School sang Enero 2 sang gab-i.

Suno kay Dr. Belinda Dinopol, principal sang Jaro National High School, akig ang mga ginikanan sang mga napulpugan sang nagsugilanon sila kahapon, Enero 3, upod sa trainer nga si Tootsie Vergara.

Base sa obserbasyon ni Dinopol, indi na pagpadayunon sang mga ginikanan ang ila kabataan sa pag-intra sa Dinagyang Festival subong nga tuig.

Nagapamilit pa suno sa iya ang mga kabataan nga mapadayon gihapon sa pag-intra apang kinanghanglan nga respetuhon ang desisyon sang ila mga ginikanan.

Una ginpahayag ni Dinopol nga gilayon man nagpangayo sang pasaylo si Vergara sa mga kabataan sa iya nahimo.

Gin-abisuhan na ni Dinopol si Vergara nga i-control ang iya kaugalingon kag indi magpadala sa iya emosyon kun magsaway sa mga kabataan.