Kasadyahan Festival, dapat may kaugalingon nga identity kasubong sang Dinagyang Festival — DOT 6

By: JoMaque | Enero 5, 2020

Iloilo City — Madugay na nga ginsuhestyun ni Department of Tourism 6 Regional Director Helen Catalbas nga sayluhon sa iban nga bulan ang Kasadyahan Festival agud mahatagan sang identity.

Suno kay Catalbas, sang ginauyatan pa lang sadto sang Iloilo Dinagyang Foundation Inc. (IDFI) ang Dinagyang Festival, gina-proponer na niya ang posibilidad nga may separado nga festival para sa Kasadyahan Regional Cultural Competition bisan pa indi ini matawag nga Kasadyahan.

Pero wala sadto ginsapak ang iya suggestion gani wala na niya ginpadayon.

Sang naghiwat naman sang first consultation meeting ang Iloilo Festivals Foundation Incorporated (IFFI) nga amo ang naga-uyat subong sang Dinagyang 2020, nahisugtan nga i-separar ang Kasadyahan.

Nagapati si Catalbas nga mas makapaayo sa siyudad kun may mahimo nga bag-o nga event bangud nagakahulugan ini sang madamo nga tourist arrivals kag dako nga kita sa mga hotels, malls kag restaurants sa Iloilo City.

Sa subong, wala pa nadesisyunan suno sa iya kun ano nga bulan hiwaton ang Kasadyahan.