10 napilasan matapos na-side swipe sang Ford Fiesta ang army truck sa Barotac Viejo

By: JoMaque | Enero 6, 2020

Barotac Viejo — 10 ang pilason lakip ang tatlo ka menor de edad sang naside-swipe sang Ford Fiesta ang truck sang Philippine Army sa kurbada sa Barangay San Juan, Barotac Viejo kahapon, Enero 5.

Suno kay Police Staff Sergeant Rio Dawn Mitchelle Candelario, imbestigador sa Barotac Viejo Police Station, tatlo ang napilasan nga mga soldado samtang napilasan man ang apat ka sibilyan nga sakay sang truck.

Tatlo naman ka menor de edad ang napilasan nga sakay sang Ford Fiesta.

Sa imbestigasyon sang pulis, halin sa Balasan ang truck nga nagpanghatag sang relief goods sa mga naapektuhan sang bagyo Ursula antes nagluntad ang insidente.

Halin naman sa syudad kag papauli na sa Barotac Viejo ang Ford Fiesta nga ginamaneho ni Rene Sampani.

Nagtakilid ang truck samtang nawasak naman ang pang-una nga bahin sang Ford Fiesta pagkatapos sang insidente,

Gindala sa ospital ang mga napilasan nga may menor nga mga pilas.

Lakip sa mga napilasan si Darla Angela Baldonado kag iya iloy nga si Ma. Rhea nga sakay sang truck.

Nag-volunteer ang mag-iloy sa pagpanghatag sang relief goods sa Balasan.