Jetster Mandadero nga LTO 6 enforcer, ginreklamo; complainants, gin-isyuhan TOP nga wala naka-seat belt bisan nagpa-athag nga manaug sa salakyan rason ginkakas ang seat belt

By: Aine Grace Bravo | January 6, 2020

via Jeremy Brian Valle

Iloilo City — Nagreklamo ang duha ka empleyado sang bangko bangud sa indi insakto nga pagdakop sa ila sang enforcer sang Land Transportation Office 6 sang Biernes, Enero 4.

Natabo ang insidente sang nag-park ang tagreklamo sang iya salakyan sa Diversion Road, Mandurriao.

Suno sa tagreklamo, gin-isyuhan siya sang temporary operator’s permit (TOP) sang enforcer nga ginkilala niya kay Jetster Mandadero matapos ginhambalan nga wala sila naka-seatbelt sang iya upod.

Ginpaathag naman sang tagreklamo nga nga kinahanglan niya kuhaon ang iya seatbelt bangud manaug siya sa salakyan kag may kadtuan sa Carlos Uy Building.  

Ginpamangkot sang enforcer ang tagreklamo kun diin sila makadto kag sang ginsabat nila nga makadto sila sa Aksyon Radyo, naghambal ang enforcer nga dakpon sila kun mag-park sa lugar.  

Nagpaaman pa sang istorya ang enforcer suno sa tagreklamo nga hambalon ang Aksyon Radyo nga magbutang sang parking area sa idalum sang building.