Mga ginikanan sang mga kabataan nga ginpulpog sang microphone sa ulo sang trainer sang Tribu Salognon, desidido nga magpasaka sang kaso batuk sa trainer

By: JoMaque | Enero 6, 2020

Iloilo City– Handa magpasaka sang kaso ang mga ginikanan sang mga kabataan nga ginpulpog sang microphone sa ulo sang trainer sang Tribu Salognon sang Jaro National High School sang Enero 2.

Suno sa guardian sang isa sa mga bata, ginatun-an pa nila ang mga technicalities sang kaso nga pwede nila ipasaka batuk kay Tootsie Vergara.

Apang patapuson pa nila ang Dinagyang festival subong nga tuig antes padayunon ang reklamo.

Ginka-konsiderar man suno sa iya sang mga ginikanan ang mangin epekto sa Tribu Salognon kun subong nila ipadayon ang kaso.

Luyag sang mga ginikanan nga ma-correct ang sala nga mga pamaagi sa pagtudlo kag pagdisiplina sang mga trainer sa ila mga talent kag magserbe ini nga eye-opener sa tanan agud indi na masulit pa ang natabo.

Una na ginpahayag sang principal sang Jaro National High School nga si Dr. Belinda Dinopol nga respetuhon niya kun ano man ang mangin desisyon sang mga ginikanan sang kabataan kag magaserbe lang siya nga middleman sa tunga ni Vergara kag sang mga ginikanan.