(UPDATE) Abogado nga taxi operator, indi komporme sa intrepretasyon sang LTO 6 official nga dapat patyon ang makina sang salakyan antes magkakas sang seat belt

By: Aine Grace Bravo | January 7, 2020

via Hotline

Iloilo City — Naghatag sang opinyon ang abogado kag operator sang Light of Glory Taxi nga si Atty. Joseph Vincent Go kasunod sang gin-issue nga interpretation sang Land Transportation Office 6 official sa Republic Act No. 8750 ukon Seat Belts Use Act of 1999.

Suno kay Atty. Go, ginarespeto niya ang opinyon sang LTO6 bilang lead agency sa pag-implementar sang mga laye sa trapiko.

Pero sa personal nga opinyon ni Go bilang abogado, ginpahayag niya nga dapat lantawon anay ang kahulugan sang “motor vehicle of running engine.”

Una na ginpahayag ni Mr. Jojo Jamerlan, deputy chief sang Operations Division sang LTO6 nga dapat patyon gid anay ang makina sang salakyan antes magkakas sang seat belt ang pasahero ukon driver sang salakyan.

Ang pahayag ni Jamerlan kasunod sang reklamo sang duha ka empleyada sang bangko nga gindakop ni LTO enforcer Jetster Mandadero sa Diversion Road, Mandurriao sang Enero 4 bangud nagkakas sang seat belt para manaog.

Ginrason sang driver nga naka-seat belt ang iya upod kag ginhukas lang agud manaog.

Nagpondo ang salakyan sa loading/unloading bay. Gin-isyuhan sang temporary operator’s permit ang driver.

Sa Section 3 sang RA 8750, ang motor vehicle of running engine “shall refer to a vehicle as stated herein, OPERATING and standing on any road or thoroughfare with engine running.”

Suno kay Go, wala sang kwestyon nga naga-andar ang makina kag yara sa dalan ang salakyan sang tagreklamo sang gindakop. Pero ang daku nga kwestyon kun naga-OPERATE bala ini?

Ang tinaga nga “operating” suno kay Go tuman ka kritikal agud ma-establisar kun bala may violation ang driver ukon wala.

Kun nagapondo suno sa iya ang salakyan, wala ini naga-operate bisan pa nga naga-andar ang makina.

Kun sundon ang interpretasyon ni Jamerlan suno kay Go, magatuga ini sang pagpugok sang trapiko bangud mangin mas malawig ang pagtenir sang salakyan kun patyon kag paandaron ang makina kun magpapanaug kag magpasaka sang pasahero.

Mas mangin mapin-ut suno sa iya ang kahimtangan sang mga drivers sang de-pasahero nga jeep ukon taxi, may epekto sa battery kag starter sang salakyan kag magadaku ang gasto sa maintenance.

Bangud sa isyu, mangayo sang kaathagan sa LTO si Atty. Go.

Suno pa sa dugang nga pagpanalawsaw sang Aksyon Radyo Iloilo ang “operating a motor vehicle” nagakahulugan sang “physical manipulation or activation of any of the controls of a motor vehicle necessary to put it in motion.