Pag-regulate sang mga talipapa sa kabaranggayan sa Iloilo City, ginaduso ni Councilor Ely Estante

By: Aine Grace Bravo | January 8, 2020

via Hotline

Iloilo City — Sapulon ni Councilor Ely Estante, chairman sang Committee on Market and Slaughterhouse sa City Council,  ang mga barangay officials sa siyudad  agud ma-regulate ang mga talipapa nga naga-operate sa kabaranggayan.

Kasunod ini sa reklamo sang mga market vendors nga wala na nagakadto sa merkado ang mga bumalakal bangud may mga talipapa na.

Lakip sa i-regulate suno kay Estante ang sanitation, garbage disposal kag mga ginabaligya nga karne nga dapat mahalin sa Iloilo Slaughterhouse. Dapat man indi mag-obstruct sa traffic flow ang mga stalls sa mga talipapa.

May apat man ka rekomendasyon si Estante sa ila sinapol nanday Charlie Hofileña, ang Executive Assistant for Market; Executive Assistant for Slaughterhouse Simplicio Subaldo kag Local Economic Enterprise Office Head Ariel Castañeda.

Una dire ang pag-reconstitute sa Task Force Hot Meat, ikaduha ang pagpasar sang ordinansa nga magahatag sang otoridad sa LEEO nga i-supervise ang mga talipapa; ikatatlo ang pagtukod sang posisyon nga Livestock Inspector para mag-inspect sa mga talipapa kag ikaapat ang pag-reconvene sa market committee.

Ginabanta sa 15 ka mga talipapa sa mga barangay ang na-lista ni Estante.

Gin-ako sang konsehal nga indi matandog sang city government ang nasambit nga mga talipapa bangud sakup ang mga ini sang mga barangay gani regulation lang ang ma-obra sang siyudad.