2 babaye nga nakuhaan sang cellphone sang nagbisita sa IDJ-Male Dormitory sa Ungka, Jaro, napakaan na sang kaso

By: JoMaque | Enero 9, 2020

Iloilo City — Napasakaan na sang kaso ang duha ka babaye nga nakuhaan sang cellphone sa sulod sa area sang Iloilo City Distric Jail-Male Dormitory kahapon sang hapon Enero 7.

Ginkilala ang mga naaresto kanday Grace Doromal, 48-anyos kag Cheryll Cuagon, 42-anyos.

Suno kay Doromal, wala siya nakahibalo nga bawal magdala sang cellphone sa sulod sang BJMP Ungka, Jaro.

Suno kay Jail Superintendent Mary Chanette Espartero, Jail Warden sang Iloilo City District Jail-Male Dormitory, ala 1:45 sa hapon sang  nakuha kay Cuagon sa una nga checking area ang cellphone nga nakatago sa iya panyo, samtang ala 1:49 sa hapon sa ikaduha nga checking area nakuha kay Doromal ang cellphone nga nakabutang sa likod sang bulsa sang iya pantalon.

Ginpahayag ni Espartero nga sa gate pa lang samtang ginalawag ang ila ngalan ginahambalan na ang mga nagabisita nga ibilin ang ila mga dala kapareho sang cellphone kag mga matalom nga bagay.

Sa tiun nga makasulod sa log-in area, gina-remind naman sila nga ipaguwa kag ibilin ang mga ginabawalan sa sulod sang BJMP.

Dugang pa ni Espartero nga nagahimo sila sang orientation sa mga nagabisita sa BJMP may kaangtanan sa mga ginadumilian sa sulod sang jail facility.

Nakita man sa record nga ang iban nga mga nakuhaan sang cellphone, ginahimo na nila nga habitual, rason nga ginpasakaan sang kaso ang duha.

Ikaduha na ka beses nga nakuhaan sang ginadumilian nga gamit sa sulod sang BJMP si Cuagon. Sang August,  una nga nakuhaan sang ginabawal nga gamit si Cuagon.

Sa patakaran sang BJMP,  isa ka bulan nga gina-ban sa jail facility ang pamilya nga makuhaan sang kontrabando.

Ginklaro man ni Jail Superintendent Espartero nga may ara sang laye ang Iloilo nga Regulation Ordinance  No.2018-058 nga nagapahanugot nga pwede ma-preso sang 180 adlaw ukon tatlo ka buwan ang mga madakpan nga nagadala sang ginadumilian nga bagay sa sulod sang jail facility.

Nagpamalibad nga magpa-interview ang duha ka nadakpan.