Hepe sang Mandurriao Police Station, nakasabat na sa ginapangayo nga paathag may kaangtanan sa snatching sa Mandurriao sang Enero 5

By: JoMaque | Enero 9, 2020

Iloilo City— Naka-submit na sang explanation si Major Marlon Valencia, chief sang Mandurriao Police Station kay Iloilo City Police Office (ICPO) director Martin Defensor Jr., may kaangtanan sa snatching nga natabo sa Bolilao, Mandurriao sang Enero 5 sang kaagahon.

Ginpangayuan ni Defensor sang paathag si Valencia kun ngaa wala gilayon maaktuhan ang snatching nga natabo sa babaye nga nagatabok sa atubang sang Paseo de Archangeles. May mga lapses nga nakita si Defensor bangud suno sa iya dapat nga pulis nga naka-standby sa lugar.

Base sa explanation ni Valencia, gin-aktuhan man sang pulis ang natabo. Ginpangita suno sa iya sang kapulisan ang snatcher nga nakasakay sa motorsiklo apang wala nakit-an.

Na-delay ang pagpangayo sang bulig sang babaye nga biktima bangud ang pulis nga naka-standby malapit sa Injap Tower pa ang iya ginpangayuan sang bulig.

Ginpang-deploy na ang mga Police Motorcycle Unit sa siyuad halin Enero 5 agud magbantay sa siyudad.