Mga Pinoy sa Iran, Iraq, Lebanon, piliton kon kinahanglanon sa ipatuman nga repatriation sang Phil gov’t –OWWA 6
By: JoMaque | Enero 9, 2020
Iloilo City – Piliton kon kinahanglanon ang mga Filipinos sa Iran, Iraq kag Lebanon sa ipatuman nga repatriation sang Philippine government bangud sa padayon nga paglala sang tensyon kaupod ang Estados Unidos.
Suno kay Overseas Workers Welfare Administration (OWWA) 6 Welfare Officer 3 Jack Arroyo, may mga officials na sang gobyerno nga ginpadala sa nasambit nga pungsod para sa repatriation kag piliton ang mga Filipino nga magpauli sa pungsod sa katuyuan nga malikawan maipit sa kinagamo.
Gindeklarar na sang Philippine government ang Alert Level 4 sa Iraq.
Gin-ako niya nga madamo sang mga Pinoy ang indi luyag nga magpauli sa Pilipinas bangud sa kahangawa nga madulaan sang trabaho.
Pero indi na dapat suno kay Arroyo nga hulaton pa nga may malain nga matabo.
Ginkumpirmar man niya nga may plano na ang gobyerno kon paano tipunon ang mga Pinoy halin sa tatlo ka mga pungsod antes papaulion sa pungsod. Ginpasiguro man ni Arroyo nga wala sang gastuhan ang mga Pinoy kon sila ang magpauli bangud sabton ini sang gobyerno.
“SA ILOILO”
Ginpanugyanan ni Arroyo ang pamilya sang mga Ilonggo nga may himata sa nasambit nga pungsod nga makig-angot sa PESO kag magdangop sa help desk nga ipahamtang sang Iloilo Provincial Government sugod sa Biyernes, Enero 10.
Sa Region 6, 30 ka mga Overseas Filipino worker sa Iran kag Iraq sa diin 29 ang inactive kag isa lang ang active. Paathag ni Arroyo ang mga inactive ang nakapa-member sa OWWA pero wala na liwat nakapa-register.
May mga OFWs naman sa Lebanon suno kay Arroyo, pero wala pa sang kumpleto nga data ang OWWA 6 sa mga Ilonggo bangud may mga ara nga wala nakapa-rehistro sa OWWA kag POEA.
Ginkumpirmar man niya nga may tatlo na ka mga Ilonggos nga nagpangayo sang bulig sa ila agud mapapauli ang ila himata.
“HELP DESK SA IBAN NGA PROBINSIYA SA WESTERN VISAYAS”
Kon mangin epektibu ang ipahamtang nga help desk sang Iloilo Provincial government, ipatuman man ini sa iban nga probinsiya sa Western Visayas.