Anti-Smoking Ordinance, hugot nga ipatuman sa Dinagyang 2020 – ICAST head

By: Aine Grace Bravo | January 10, 2020

Via KhenJo Terco

Iloilo City — Hugot nga ipatuman sang Iloilo Anti-Smoking Task Force (ICAST) ang Anti-Smoking Ordinance sa siyudad sa Dinagyang Festival 2020.

Suno kay ICAST head Mr. Iñigo Garingalao, isa ka semana antes ang pagsugod sang Dinagyang, magalibot na ang ICAST teams agud magpatuman sang ordinansa.

Nagabisita man sila sa mga eskwelahan kun diin naga-practice ang mga tribu nga mapasakup sa Dinagyang kag ginapahanumdom ang mga trainers nga dumilian ang mga warriors/estudyante nga magpanigarilyo sa practice kag pati na sa ila pagpuli.

Bisan ang mga establisemento, pantalan kag merkado ang ginabisitahan man sang taga-ICAST agud magpahanumdom sa kasuguan.

Nahibaluan na sang taga-ICAST suno kay Garingalao ang hulag sang mga nagapanigarilyo sa siyudad ilabi na kada Dinagyang.

Las-siete kaina sang aga, nag-umpisa na sa paglibot ang duha ka teams sang ICAST.