Partial road closure sang karsada sa Pavia pakadto sa Ungka, suguran sa Enero 13 para sa construction sang P480 million nga Ungka II flyover

By: Aine Grace Bravo | January 11, 2020

via Hotline

Pavia, Iloilo — Suguran sa Lunes, Enero 13, ang partial road closure sang karsada halin sa Pavia pakadto Ungka kag vice versa bangud sa natalana nga pag-umpisa sang construction sang P480 million nga ungka II flyover sa junction sang Sen. Benigno Aquino Jr. Avenue kag Iloilo Circumferential Road.

Suno kay Department of Public Works and Highways (DPWH) 6 Asst. Regional Director Engr. Al Fruto, tag-isa na lang ka lane sa anum ka lanes sang karsada ang mabilin bangud sa partial road closure.

Manual naman nga iga-manage sang LGU ang pagdireher sang trapiko sa traffic lights agud ma-regulate ang traffic flow.

Gin-athag ni Engr. Fruto nga Nobyembre pa lang, nagsapol na ang ahensya sa Pavia LGU kag Iloilo City government para sa pagpatuman sang road closure agud indi mangin hu-ol sa publiko ang construction sang proyekto.